ડરે છે વિશ્વ આખું, વાઇરસ વિકરાળ લાગે છે.
લડું છું તો ય કોરોના કરાલ કાળ લાગે છે.
સતત થાકી ગયો છું ને સતત હાંફી રહ્યો છું હું,
હવે તો ઓશિયાળું આયખું કંગાળ લાગે છે.
ઉધામા શ્વાસના ને ધમપછાડા ઉચ્છવાસોના,
કરી લોહી-ઉકાળા જીવવાનું આળ લાગે છે.
થયો છે રોગ કેવો કે ખબર લેતાં ડરે છે સૌ,
મને તો સાવ ખોટી આળ ને પંપાળ લાગે છે.
સહારો એટલો કે આઈસોલેશનમાં થયો છું પણ!
ઝુરાપો હૂંફનો ને સ્પર્શનો દુષ્કાળ લાગે છે.

ફફડતું હું ય જાણે સાવ ભોળું કોઈ પારેવું,
શિકારી જાળ જેવું જીવતર જંજાળ લાગે છે.
હવે માણસ મટીને હું ય કોરોના થઈ ગયો છું,
કહું છું કોઈને હું પૉઝિટિવ તો ગાળ લાગે છે.
બનું હું વૉરિયર મારો, ઈલાજ એ જ સાચો છે,
કદી હારી ન જાઉં એટલી સંભાળ લાગે છે.
નવું સપનું, નવો માણસ, નવી દિશા વસાવીશું
બધું બદલાઈ જાશે, જિંદગી જ જુવાળ લાગે છે.

સૌજન્ય : “નિરીક્ષક” − ડિજિટલ આવૃત્તિ; 01 જૂન 2020

છે આકરો ને અકળ-અઘરો, આ સમય ચાલ્યો જશે.
કે કાળમીંઢ-કરાલ કપરો, આ સમય ચાલ્યો જશે.
ગમગીન છે એથી ય વધુ ગંભીર છે વાતાવરણ,
ભૂલો નહીં ખતરનાક ખતરો, આ સમય ચાલ્યો જશે.
ઘરમાં રહેવાનું સપરમું પર્વ છે સૌ માનજો,
ના મોતનો ખેલો અખતરો, આ સમય ચાલ્યો જશે.
લ્યો સાવધાની, એ જ જંગ જીતવાનો માર્ગ છે,
ક્યાં કાયમી છે? ધીરજ ધરો, આ સમય ચાલ્યો જશે.
માણસ થયો ખાલીખમ અને બોજ ભારેખમ થયો,
માણસ થયો સાવ લઘરો, આ સમય ચાલ્યો જશે.
બાંધી ન શક્યા કોઈ એને બંધ મુઠ્ઠીમાં કદી,
ફાવી ન શક્યો કો' પેંતરો, આ સમય ચાલ્યો જશે.
આ તો સમય છે ભલભલાનોયે ઊતારી દે નશો,
નવરો ય ને કેવો નફકરો, આ સમય ચાલ્યો જશે.
અવસર મળ્યો છે આંસુઓને લૂછવાનો આજ તો
ખાલી કરો ના બસ ખરખરો, આ સમય ચાલ્યો જશે

સૌજન્ય : “નિરીક્ષક” − ડિજિટલ આવૃત્તિ; 25 મે 2020