ક્યાંથી આવી
કે મોકલી કોઈએ ધક્કો મારી
ન ખબર પડે
લગીર પેટને
પેટ નાનું ખોબા જેવડું
ખોબા જેટલું પેટને પૂરતું
પાણી પણ રમત કરતું
પેટમાં જતું તુર્ત નીકળતું
આવતી, રહેતી, જતી-આવતી ચૂક પેટમાં
કૂમળી આંગળીઓની છાપ પેટ પર ફેરવાઈ ડાઘમાં
શરીર ભીતરનું બહાર આવવા મથ્યા કરતું
શરીર બહારનું ભીતર ઘૂસવા તનતોડ મથતું
બેઉનું જોર વધતું ચાલ્યું
જીત્યાં બેઉ પેટ હાર્યું !
[ત્રિપુરાના અગરતલામાં, લૉકડાઉનને કારણે, ભૂખથી બે વર્ષની બાળકીના મોતના સમાચાર વાંચી આ રચના લખી છે.]
e.mail : umlomjs@gmail.com
નથી એવું જોયો પહેલીવાર
અગાઉ જોયો ઘણીવાર
પણ આજ
થયું પહેલીવાર
ગોળ એવો
દોણીમાંના દૂધ જેવો
સફેદ-ઊજળો
સુજાતાએ આપેલી ખીર સમો
દૂર ઝાડ
પારખાય
ખખળ્યો પીપળો
ટપક્યો પીપળો
ટપકે શું, પરખાય શેનું
પરખાય એટલું, ન ટપકે એનું
પીપળા પડખે રસ્તો સફેદ ભાસે
સફેદ રણનો પટ્ટો લાગે
ઉપર ગોળ, લાંબા, છેડા કાઢતા ક્યાંક ત્રાંસા
અહીં-તહીં, છેક આઘે લાલ ટીપાં મોટાં-નાનાં
ઉપર ચંદર*
મંદ-મંદ ઊતરે અંદર
સફેદ-ઊજળો
સુજાતાએ આપેલી ખીર સમો.
—
*ચંદર – ચંદ્ર
e.mail : umlomjs@gmail.com
હવે દેખાઈ ભીંત ઘરની
પોપડી ઊખડેલી ભીંત પરની
અડતો ટેકતો બરડો ખણતો
ટેરવાં લૂછતો, ક્યારેક અમસ્તું કંઈક લખતો
યાદ આવ્યું આજ સઘળું
સઘળું જોયું ભીંત પરનું.
ભીંત પરની જોઈ છત
છત નીચેનું તળિયું પણ
ભીંત અમસ્તી હોતી નથી
સૌંદર્યની ધરી ખરી
પાયાની એ પ્રેમદુલારી
પિલ્લરની એ પ્રાણપ્યારી.
ભીંત વચ્ચે ગણગણ કલકલ
ક્યારેક-ક્યારેક કલબલ-કલબલ
ન આવે જાણમાં ભીંત બહારનું
શાંત છતાં ભેંકાર ભોરીંગતું
વિચાર આવતા ફફડી જવાય
ઘનઘોર જંગલમાં જાણે ભટકી પડાય
ફફડાટ રહ્યો છોને આજનો
ભટકાવમાં ભલે ભય-ધ્રાસકો
છતાં કંઈક ઊપસ્યા કરે
ભાત-ભાતની ભીંતથી ઘનઘોર જંગલ ડર્યા કરે.
e.mail : umlomjs@gmail.com