રાહુલ ગાંધીની નબળાઈ છે કે તેઓ મોદી-શાહની માફક ‘પરમ-પવિત્ર’ રીતે ચૂંટણી લડી શકતા નથી !
બિહારમાં, મોદી-શાહ અને તેમની ટોળીએ રાહુલ-તેજસ્વી જોડીને ધૂળ ચાટતી કરી દીધી છે. મીડિયા / વિશ્લેષકો રાહુલને દોષિત ઠરાવી રહ્યા છે. તો આપણે પણ વહેતી ગંગામાં હાથ-મોં ધોઈ લઈએ.
હકીકતમાં, રાહુલને ચૂંટણી લડવાની સમજણ પણ નથી, તે કેવી રીતે જીતી શકે?
કેટલાંકે હજારો ખામીઓ સૂચિબદ્ધ કરી છે, જેનું અહીં પુનરાવર્તન કરવાની જરૂર નથી, પરંતુ અમે કેટલીક ખામીઓ ગણાવીશું.
સૌ પ્રથમ, રાહુલે બધી ‘અનૈતિક’ પ્રથાઓ છોડી દેવી જોઈએ અને મોદી-શાહની જેમ ‘આદર્શ’, ‘શુદ્ધ’, ‘સાત્ત્વિક’ અને ‘પરમ-પવિત્ર’ રીતે ચૂંટણી લડવી જોઈએ.
આ શું? તમે રોજગાર, ખુશહાલી, વિકાસ વગેરે વિશે વાત કરીને ચૂંટણી લડી રહ્યા છો ! અરે, આ ‘અમૃતકાળ’ છે, આ બધું અહીં ન ચાલે.
થોડીક ધૂર્તતા, થોડી લુખ્ખાગીરી, થોડી નફરત, થોડું જૂઠ, થોડી છેતરપિંડી, ચોરી અને લૂંટ વગર ચૂંટણી હોય?
હવે ચાલો તમને કહીએ કે રાહુલે શું કરવું જોઈતું હતું :
[1] પહેલા, તેમણે પોતાનું ચૂંટણી પંચ બનાવવું જોઈતું હતું અને SIR દ્વારા 65 લાખ મતદારોના નામ મતદાર યાદીમાંથી ઉડાવી દેવાની જરૂર હતી. પછી, અરજીઓ લઈને, તેમણે ઇચ્છા મુજબ 1.6 મિલિયન મતદારો ઉમેરવા જોઈતા હતા. વધુમાં, તેમણે કોઈપણ લપમાં પડ્યા વિના 5 લાખ મતદારો ઉમેરવા જોઈતા હતા. ચૂંટણી પંચને ખીલે બાંધી દેવું જોઈતું હતું, અને આદર્શ આચારસંહિતાને ‘અથાણું’ બનાવી બરણીમાં પેક કરવાની જરૂર હતી. રાહુલે પોતાની ‘સુપ્રીમ કોર્ટ’ પણ બનાવવી જોઈતી હતી. જે વ્યાસપીઠ પર બેસીને SIR જેવા મુદ્દાઓ પર ઉપદેશ આપતી રહે. સુપ્રીમ કોર્ટે અનિલ મસીહને ‘લોકશાહીનો હત્યારો’ કહીને છૂટા આખલાની જેમ છુટ્ટો મૂકી દીધો હતો. અરે, રાહુલ આ સરળ કામ પણ કરી શક્યા નહીં.
[2] ચૂંટણીની જાહેરાત પહેલાં દસ હજાર રૂપિયા સીધા મહિલાઓના ખાતામાં જમા કરાવવાના હતા. કુલ મળીને, ફક્ત થોડા અબજ રૂપિયા આપવાના હતા. જો કોઈ ફરિયાદ કરે, તો પોતાના ખીલે બાંધેલ ચૂંટણી પંચ મારફતે કહેવડાવી દીધું હોત કે ‘ચાલુ યોજના’ છે અને તેથી તેને રોકી શકાય નહીં ! રાહુલ થોડા અબજ રૂપિયા ખર્ચી શક્યા નહીં.
[3] રાહુલે સમગ્ર ચૂંટણી દરમિયાન તેમના ભાષણોમાં એક પણ વખત ‘કટ્ટા’, ‘છર્રા’, કે ‘મુજરા’ જેવા શબ્દોનો ઉપયોગ કર્યો નહીં. અરે, જો ચૂંટણી લડી જ રહ્યા છો તો તમે સડકછાપ ભાષા ડાયલોગ ન બોલી શકો તો ચૂંટણી શા માટે લડો છો? શું નુકસાન થવાનું હતું જો તમે એક વાર કહ્યું હોત કે કાકા ટ્રમ્પે ‘મોદીની કાનપટ્ટી પર કટ્ટો’ રાખીને સીઝફાયર કરાવ્યું હતું ! રાહુલ બદમાશોની જેમ બોલી શક્યા નહીં.
[4] ચૂંટણી શરૂ થાય તે પહેલાં, કોઈ બદમાશ તેની માતાને ગાળો આપે અને તે દરેક મંચ પરથી આંસુ વહાવીને કહેત કે જુઓ, મારી માતાને ગાળો દઈ રહ્યા છે. તેમનો પક્ષ બિહાર બંધ કરાવત અને પછી તેમાં ગાળો આપવામાં આવત. પાર્ટીના પ્રવક્તા ગોદી મીડિયામાં છાતી ફાડીને ચીસો પાડતા કે ‘જુઓ, મોદી-શાહે ગાળો આપી છે.‘ રાહુલ આટલું નાટક પણ કરી શક્યા નહીં.
[5] મતદાનના દિવસે, કર્ણાટક અને હિમાચલ પ્રદેશથી ટ્રેનમાં ભરી ભરીને મોટી સંખ્યામાં મતદારોને મતદાન કરવા મોકલવાના હતા. દિલ્હી, ઉત્તર પ્રદેશ કે અન્યત્ર મતદાન કરી ચૂકેલા પક્ષના પદાધિકારીઓ / કાર્યકર્તાઓને બિહારમાં મતદાન કરાવવાનું હતું. પરંતુ કંઈ થયું નહીં. રાહુલ આટલો ખેલ કરી શક્યા નહીં.
[6] આખી ચૂંટણી દરમિયાન ‘ઘૂસપેઠિયા’નો રાગ આલોપવાનો હતો. ઘૂસપેઠિયા, ઘૂસપેઠિયા કહીને ખૂલ્લેઆમ ‘હિન્દુ-મુસ્લિમ’ કરવાની જરૂર હતી. તેમણે દરેક સભામાં કહેવાનું હતું કે ‘જુઓ, મારી સરકાર છે, આ મારા ગૃહ મંત્રી છે, છતાં લાખો ઘૂસપેઠિયા ઘૂસી ગયા છે અને મતદારો બની ગયા છે !’ તેમણે કહેવાનું હતું કે ‘હું અને મારી સરકાર સંપૂર્ણ નિષ્ફળ છીએ, તેથી મને મત આપો.’ રાહુલ ન નફરત ફેલાવી શક્યા કે ન પોતાની નિષ્ફળતાઓ બતાવી શક્યા !
[7] રાહુલે પોતાની ED, CBI, IT વગેરે બનાવી વિરોધી નેતાઓની કમર તોડી નાખવાની જરૂર હતી. તે ઓછામાં ઓછું બીજા રાજ્યમાં વિપક્ષી ઉમેદવારના ઘર પર બુલડોઝર મોકલીને તેને ધૂળ ભેગું કરાવી શક્યા હોત. રાહુલ આટલું સરળ કામ પણ ન કરી શક્યા !
આ બધી નૈતિક, શુદ્ધ, સાત્ત્વિક અને પરમ-પવિત્ર પદ્ધતિઓનો ઉપયોગ કરીને ચૂંટણી લડી હોત, તો તેમને કદાચ નાની જીત મળી હોત, પણ શું કરીએ, રાહુલને ચૂંટણી લડવાની સમજણ જ નથી !
પણ સાંભળો, રાહુલ,
ભલે હજારો ચૂંટણીઓ હારો પણ
ક્યારે ય ‘મોદી-શાહ’ જેવા બનશો નહીં.
ક્યારે ય તેમના જેવું ઘટિયા ભાષણ કરશો નહીં. ક્યારે ય નફરત ફેલાવશો નહીં,
ક્યારે ય તેમના જેવું જૂઠું બોલશો નહીં,
ક્યારે ય મત ચોરી કરશો નહીં.
જે દિવસે તેમના જેવા સહેજ પણ બનશો, તે દિવસે ઘણા લોકો માટે આશાનો દીવો ઓલવાઈ જશે.
આમ જ પ્રકાશતા રહો,
આમ જ આગળ વધતા રહો.
[સૌજન્ય : વરિષ્ઠ પત્રકાર ડો. રાકેશ પાઠક, X પર, 15 નવેમ્બર 2025]
[કાર્ટૂન સૌજન્ય : Nala Ponnappa]
17 નવેમ્બર 2025
સૌજન્ય : રમેશભાઈ સવાણીની ફેઇસબૂક દીવાલેથી સાદર
