૨૦૧૫ના વાઇબ્રન્ટ ગુજરાતના
તમાશા માટે ખાસ સિવડાયેલી
રોશનીગ્રસ્ત ગાંધીનગરની
દાંડીકુટિરમાં
બતાવાઈ રહી છે ઍનિમેશન ફિલ્મ
સ્ક્રીન પર દેખાય છે આંકડા ૧ ૯ ૧ ૫
બૅકગ્રાઉન્ડમાં ગવાય છે
‘આવે છે, આવે છે, ગાંધીભાઈ આવે છે,
લાવે છે, લાવે છે, આઝાદીને લાવે છે …’
ચાલુ થાય છે લડાઈ
મસમોટ્ટા રાક્ષસ સામે …
ઘડીના છઠ્ઠા ભાગમાં રાક્ષસ
હતો ન હતો થતાં થઈ જાય છે અલોપ
બૅકગ્રાઉન્ડમાં સંભળાય છે
તાળીઓના ગડગડાટ
‘જનગણમન અધિનાયક જય હૈ ભારત ભાગ્યવિધાતા …’
‘સારે જહાં સે અચ્છા હિન્દોસ્તાં હમારા …’
‘સબ સે ઊંચા રહે તિરંગા …’
પ્રાર્થનામાં છૂટેલી ગોળીમાંથી સંભળાય છે.
હે … રામ ….
વૈષ્ણવજન તો તો તેને રે કહીએ, જે પીડ પરાઈ જાણે રે …
પણ
રુદ્ર તાંડવ કરી ત્રાટકે લોલુપ કામ સામે,
સંહારે કામને, રતિના વિલાપથી
ફરી થાય સજીવન કામ અનંગ રૂપે
તેમ
પેલો અલોપિયો રાક્ષસ
પ્રવેશે છે અનંગ ધૂમ્રસેર બનીને …
ધૂર્ત ધૂમ્રસેર રાક્ષસ ગૂંગળાવે છે
ઝેરી હવા બનીને …
દૈવીમંત્રો, શ્લોકો ઉચ્ચારતો, ફટકારતો રાક્ષસ
અદૃશ્ય હાથોથી ગળા ભીંસે છે …
પોકારે છે કરોડો કરોડો …
માત્મા, માત્મા, … બચાવો … બચાવો …
પણ સદી પછી
મહાત્મા તો બિચારો Moll મંદિર બની ગયા છે.
પહેલા બચવા માટે રાક્ષસો
મંદિરમાં બેઠેલા ઋષિઓનાં કમંડળના નાળચામાં ઘૂસી જતાં
પણ હમણાં તો ગાંધીના ઝાડુને ય છોડતા નથી.
અલોપિયો રાક્ષસ ઘૂસી ગયો છે
ગાંધીભાઈના ઝાડુમાં …
તેથી જ સ્તો
અમેરિકન પાદુકા સિંહાસન પર મૂકી
નંદિગ્રામને સ્માર્ટસિટી બનાવાઈ રહ્યું છે.
અયોધ્યાની સુરક્ષાના એમ.ઓ.યુ.
એફ.ડી.આઈ.માં રાવણ સાથે જ થયાં છે …
શરૂ કરવી પડશે ફરી
વાઇબ્રન્ટ લડાઈ,
ઇનવિઝિબલ વાઇબ્રન્ટ રાક્ષસ સામે.
વડોદરા
સૌજન્ય : “નિરીક્ષક”, 16 માર્ચ 2015, પૃ. 10
