જજો, ફરી જજો,
એ કિનારે જઈને પણ દીવો પ્રગટાવજો,
પણ પહેલાં આપણું આ આંગણું કંઈક કહેવા માગે છે,
એ લહેરાતા પાલવ સાથે વારંવાર જાસૂદની ડાળ અટવાઈ જાય છે
એક દીવો ત્યાં પણ પ્રગટાવજો;
જજો, ફરી જજો,
એક દીવો જ્યાં નવી નવી ધરોની કૂંપળો ફૂટી છે,
એક દીવો જ્યાં પેલા નાના ગલગોટાએ
હાલ જ પહેલી પાંખડી ખોલી છે,
એક દીવો પેલી દૂધી નીચે
જેનો વેલો તમને સ્પર્શ કરવા વ્યાકુળ છે
એક દીવો જ્યાં ગાગર રાખી છે,
એક દીવો જ્યાં વાસણ માંજવાથી ખાડા જેવું દેખાય છે,
એક દીવો જ્યાં હમણાં જ ધોયેલા નવા ચોખાનું સુગંધભર્યું પાણી ફેલાયું છે,
એક દીવો એ ઘરમાં જ્યાં નવા પાકની અજંપાભરી સુગંધ છે,
એક દીવો પેલી બારી પર
જ્યાંથી દૂર નદીની હોડી અવારનવાર દેખાય છે
એક દીવો જ્યાં જટાળો કૂતરો બાંધીએ છે
એક દીવો જ્યાં ગાયને દોહીએ છીએ
એક દીવો જ્યાં આપણો વહાલો જટાળો કૂતરો આખો દિવસ ઉંઘ્યા કરે છે,
એક દીવો પેલી પગદંડી પર
જે અજાણી ગુફાઓની પેલે પાર ગરકાવ થઈ જાય છે,
એક દીવો પેલા ચાર રસ્તા પર
જે મનના બધાં લાચાર રસ્તા છીનવી લે છે,
એક દીવો પેલા ઉંબરે,
એક દીવો પેલા ગોખલે,
એક દીવો પેલા વડ નીચે પ્રગટાવજો,
જજો, પાછા જજો,
પેલા તટ પર પણ દીવો પ્રગટાવતા આવજો
પણ પહેલાં આપણું આ આંગણું કંઈક કહેવા માગે છે,
જજો, ફરી જજો!
ફોટો સૌજન્ય : ‘ગૂગલ’
e.mail : rupaleeburke@yahoo.co.in
