જે ફરીથી અમેરિકન કવિ જેમ્સ ક્રૂઝના એક કાવ્ય ‘ Say Yes’નો મારો અનુવાદ; આજે માનસિક સ્વાસ્થ્ય દિન નિમિત્તે ખાસ. 

અનુવાદની મંજૂરી આપવા માટે James Crewsની આભારી છું. એમનાં અન્ય કાવ્યો jamescrews.net પર વાંચી શકાશે. 

•

હા કહો.

ઘરની બહાર જવા માટે તમે પહેરો છો એ ચામડાના સેન્ડલને સ્વીકારો.

હાથ પર પડતા તડકાને વધાવી લો.

અરે, મચ્છરના ડંખથી ઊપસી આવીને તમને બોલાવતી ગુલાબી ફોલ્લીને હા બોલો.

હા કહો, ઘર પાછળના કાયમી અંધારિયા ખૂણે 

ભૂલાઈ ગયેલા, ચિરાયેલા ભૂરા પ્લાસ્ટિક વચ્ચેથી

ઊગી નીકળેલા જંગલી ફૂલછોડના ઝુંડને.

જે અંધકારમાં તમે વધુ ને વધુ

ખૂંપતા જાઓ છો

એ જ અંધકારમાં ચમકી રહેલાં ઝીણાં ગુલાબી પુષ્પોને હા કહો, 

જેથી એમણે આપેલું વચન તમને મળી શકે :

હા, એ કહે છે – હા, તમને પણ

પ્રકાશ દુર્લભ હોય એવી જગ્યાઓમાં

ખીલવાના રસ્તા મળી રહેશે.

સૌજન્ય : નંદિતાબહેન મુનિની ફેઇસબૂક દીવાલેથી સાદર

અમેરિકન કવિ જેમ્સ ક્રૂઝના એક કાવ્ય ‘To Be Alive’ નો મારો અનુવાદ. એમનાં અન્ય કાવ્યો jamescrews.net પર વાંચી શકાશે. Thank you, James Crews.

શોકની દરેક પળમાં, એક 

નાનકડું દ્વાર હોય છે- કદાચ

મારા પાડોશીના બગીચામાં વૃક્ષ પર લટકતી માળાપેટીમાં કોતરેલા

કાણા જેવડું જ.

દેખીતું તો લાગે કે

આ સાંકડી, અંધારી જગ્યામાં 

શું પાંગરવાનું; પણ જલદી જ

ઝલક દેખાય છે મને, 

પીંછાં ફૂટવા લાગ્યા હોય એવાં બચ્ચાંની –

ઊડવા કાજે આતુર, પણ હજી

ઊડવાથી ડરતાં.

અને માદા પક્ષી 

ખોરાક લઈને આવે છે જ્યારે, અને ગમે તેમ કરીને

સાંકડા દ્વારેથી અંદર સમાય છે, ત્યારે 

સાંભળું છું હું

જીવવાની ભૂખનો કલબલાટ,

અને રેતી પાથરેલી કેડી પર

એકલા ઊભેલા મને પણ

અચાનક યાદ આવે છે

મારી પોતાની જીવનક્ષુધા.

સૌજન્ય : નંદિતાબહેન મુનિની ફેઇસબૂક દીવાલેથી સાદર