POETRY

એક કાવ્ય

અશ્વિની બાપટ
16-08-2021

એકવીસમી સદીના કવિ,
તારા શબ્દોથી
કશું હલતું નથી મારી અંદર
ને બહાર પણ
નહીં તો તું
‘વરસાદ’ લખે
ને ઘેરબેઠાં બારીબહારના વરસાદને જોઈને
પલળી ન જવાત ?
તારા શબ્દોમાં નથી કોઈ જોશ
નહીં તો તું
‘વિદ્રોહ’ લખે
ને બાલ્કનીમાં બેઠાં-બેઠાં મોરચાઓ જોઈને
રસ્તા પર ઊતરી ન પડાત ?
તારા શબ્દોમાં નથી મળતી કોઈ હૂંફ
નહીં તો તું
‘પ્રેમ’ લખે
ને ઠંડાગાર માણસો વચ્ચે ઊઠતાં-બેસતાં
હિમદંશથી મરી ન જવાત ?
તારા શબ્દોમાં નથી કોઈ ધાર
નહીં તો તું
‘બળાત્કાર’ લખે
ને શ્રદ્ધાસ્થાનોની કાળજી લેતાં-લેતાં
પેલા બળાત્કારીને વાઢી ન નાખત ?
તારા શબ્દોમાં નથી મળતું કોઈ જ્ઞાન
નહીં તો તું
‘સામાજિક ભેદભાવ’ લખે
ને મીમાંસાઓનાં થોથાં ઉથલાવતાં અમે
કોઈ દલિત ખેલાડીની હારની ઉજવણી કરતાં હોત?
તારા શબ્દમાં નથી કોઈ ડહાપણ
નહીં તો તું
‘માનવતા’ લખે
ને હજારો સદીઓથી જીવતી
ઉમ્મરવાન માણસજાતે
જાતિ-જાતિ રમવાનું બંધ ન કર્યું હોત? ..

સૌજન્ય : “નિરીક્ષક”, 16 ઑગસ્ટ 2021; પૃ. 16

Category :- Poetry / Poetry

જુઓ, દેશ આ ક્યાં છે!

મેહુલ ત્રિવેદી
16-08-2021

ભીતરમાં પોઢ્યા સૌ જાગો, જુઓ, દેશ આ ક્યાં છે?
મસ્તમુલાયમ સુખ સૌ ત્યાગો જુઓ આ દેશ ક્યાં છે!
હતો સમય તે, દેશદાઝના
  ઘોષ ગગનમાં ગાજે
તકવાદી સરકારોથી
  કેવી બરબાદી આજે!
કેટકેટલી જલતી આગો જુઓ, દેશ આ ક્યાં છે!
ભીતરમાં પોઢ્યા સૌ જાગો, જુઓ, દેશ આ ક્યાં છે!
યાદ કરો નેતાઓની તે
  ઇન્કિલાબની હાકલ !
શ્વાસોમાં તોફાન ભરીને
  આગળ ને આગળ ચલ.
ખુદની કાયરતાથી ભાગો જુઓ, દેશ આ ક્યાં છે
ભીતરમાં પોઢ્યા સૌ જાગો જુઓ, દેશ આ ક્યાં છે
બલિદાનોનાં શબની
  અગણિત જ્વાળાના અજવાળે
રાહ પામવી નવઘડતરની
  નાનકડાં સૌ બાળે!
મત આપ્યાનો હક સૌ માગો જુઓ, દેશ આ ક્યાં છે !
ભીતરમાં પોઢ્યા સૌ જાગો જુઓ, દેશ આ ક્યાં છે !

સૌજન્ય : “નિરીક્ષક” 01 ઑગસ્ટ 2021; પૃ. 16

Category :- Poetry / Poetry