POETRY

બે દૃશ્યો ....

નારણ મકવાણા
18-04-2022

ભર બજારમાં
ધોળા દિવસે
નબળા માણસ પર
શેતાન જેવા માણસનો વાર
લોહીઝાણ મારામારી, ગુંડાગર્દી
ને
આપણે
અવાચક, બબૂચક બની
નિહાળી રહ્યાં છીએ

થઈ રહ્યો છે
યુક્રેન પર
રશિયાનો સતત
અત્યાચાર, હિંસક બળાત્કાર, 
ને
વિશ્વના બધા દેશો
મૂક પ્રેક્ષકો બની
નિહાળી રહ્યાં છે ... 

(યુનો ત્રાજવું લઈ બેઠો છે વાંદરો થઈ.) 

એક જેવું નથી લાગતું?? 
આપણામાં 
ને
વિશ્વના દેશોમાં 
ફરક કેટલો?

17/4/2022

e.mail : [email protected]

Category :- Poetry / Poetry

ઈશ્વરની ભાષા બોલવા લાગ્યા?

મુસાફિર પાલનપુરી
15-04-2022

નહોતું એમનું, એ સ્તરની ભાષા બોલવા લાગ્યા,
તરંગો વિસ્તરી સાગરની ભાષા બોલવા લાગ્યા.
 
અહમ્‌માં ડૂબનારાને રહે છે ભાન કંઈ ક્યારે?
અળસિયાં પણ જુઓ અજગરની ભાષા બોલવા લાગ્યા.
 
તમે કયાં દેશને દોરી ગયા સંસ્કાર સ્વામીઓ
ઋજુ, ભોળાં શિશુ ખંજરની ભાષા બોલવા લાગ્યા.
 
હવાના જોરથી જ્યાં સ્હેજ ઊંચકાયા તો બ્હેકીને
તણખલાં પણ જુઓ અંબરની ભાષા બોલવા લાગ્યા.
 
હતા તો એ મુસાફિર સૌ ખરેખર સુક્ષ્મ જંતુઓ
મળી સત્તા અને ઈશ્વરની ભાષા બોલવા લાગ્યા.
 
રમત એવી રમી કંઈ બાગમાં નિષ્ઠુર મળીએ
સુમન જેવા સુમન પથ્થરની ભાષા બોલવા લાગ્યા.

સૌજન્ય : “નિરીક્ષક”, 16 ઍપ્રિલ 2022; પૃ. 04

Category :- Poetry / Poetry