POETRY

ફીફાં ખાંડે

હરીશ દાસાણી
16-09-2021

વાત-વડાંઓ તળી તળીને ફીફાં ખાંડે.
વકતાઓ સહુ હળીમળીને ફીફાં ખાંડે.

ઢોલનગારા તિકડમબાજી શૂરાપૂરા
લડવૈયાઓ મળી મળીને ફીફાં ખાંડે.

ઓડીકારે શેઠજી ઊતરે તાજામાજા
ધજા ચઢાવી લળી લળીને ફીફાં ખાંડે.

કઇ સોગઠી કેવી રીતે કયારે રમવી
ખેલાડીઓ કળી કળીને ફીફાં ખાંડે.

રામ ને રાવણ ખુશ કરવાં છે બંનેને
કથાકાર તો ગળી ગળીને ફીફાં ખાંડે

સૌજન્ય : “નિરીક્ષક”, 16 સપ્ટેમ્બર 2021; પૃ. 16

Category :- Poetry / Poetry

વચ્ચે

રમણ વાઘેલા
16-09-2021

આ આવજાની  વચ્ચે,
ઊભા દ્વિધાની વચ્ચે !
ઉલ્લેખ કોનો કરવો ?
આ રાવણાની વચ્ચે !
ખોટું તો નહીંને લાગે?
ખુદ ને ખુદાની વચ્ચે !
છે શહેરની સફળતા,
કુટિર - કૂબાની વચ્ચે !
પ્રસ્વેદ પાથરું ક્યાં? 
આ આપદાની વચ્ચે !
રાખી અદબ ઊભાં છે
વૃક્ષો ખિજડાની વચ્ચે !
અફસોસ આથમે ક્યાં ?
આ ખા-મ-ખાંની વચ્ચે.
તંબૂ  અમે તો તાણ્યા,
કુરાન-ગીતાની વચ્ચે !

સૌજન્ય : “નિરીક્ષક”, 16 સપ્ટેમ્બર 2021; પૃ. 16

Category :- Poetry / Poetry