POETRY

નારાજ થઈને :

મૂકેશ પરીખ
25-11-2021

તારી સભામાં આવ્યો છું હું ય બહુ નારાજ થઈને,
આમંત્ર્યો યે નહોતો અહીં તેં ય મને નારાજ થઈને!

મારી રીતે જાળવી રાખી છે મેં એ સંબંધોની મર્યાદા,
અકબંધ રહે તું તે માટે આવ્યો છું હું નારાજ થઈને.

નજર મળતાં જ મ્હોં ફેરવી લેવાની જા છૂટ છે તને,
તને જોયા પછી હું તો પાછો નહિ ફરું નારાજ થઈને.

આવી ચઢ્યો છું તારે આંગણે સ્વમાન નેવે મૂકીને,
માનભેર આવજે તું, ન આવીશ આમ નારાજ થઈને.

આવ, ગળે મળીને મનમેળ કરી જ લઈએ ‘મૂકેશ’,
ખેદ રહેશે જો આમ અલવિદા કહેશે નારાજ થઈને!

e.mail : [email protected]

Category :- Poetry / Poetry

ગઝલ

રવીન્દ્ર પારેખ
09-11-2021

ક્યાંકથી હું ખૂટી શકું,
તાંતણો છું, તૂટી શકું.
ડાળ પર રૈ' શેખી ન કર,
ફૂલ છે તું, ચૂંટી શકું !
રાખ ના એમાં તું સૂરત !
આયનો છું, ફૂટી શકું.
શ્વાસ પર શ્વાસો લખ ભલે,
એકડો ના, ઘૂંટી શકું.
તું જ સામેથી છોડી દે,
તો હું ક્યાંથી લૂંટી શકું?
ક્યાંક તો મરતું હોય કૈં,
હું ન માથું ફૂટી શકું.
મોતનું નક્કી ના કશું,
પણ ન એથી છૂટી શકું.

000

e.mail : [email protected]

Category :- Poetry / Poetry