POETRY

વિચારું છું :

દેવિકા ધ્રુવ
07-12-2021

વિચારું છું, ન વિચારું છતાં પણ હું વિચારું છું.


વિચારીને પછી મિથ્યા ગણી મનને મનાવું છું. 

 

નથી કૈં સત્ય કે ના તથ્ય, છે માયાવી જાળો આ


ને અંતે એ વિચારીને પછી સઘળું વિસારું છું.

 

જગતમાં જાત છે ને જાતમાં આખું જગત પણ છે.


ફરક તોયે ધરા ને આભના જેવો નિહાળું છું.

 

કદી ના ઊડવું ઉપર, કહે છે ઉડતું પંખી!


નથી માળો થતો આભે, તો હું વૃક્ષો સજાવું છું.

 

હતું મનમાં, પડી જળમાં, તરી જાશું વિના નૈયા


નદી સૂકાય જો વચમાં, ઊરે સાગર સમાવું છું.

 

નગારાં સૌ વગાડે નિજના ચારે દિશાઓમાં,

જઈ એકાંત, રાખી મૌન, બસ, અક્ષર ઉતારું છું.

e.mail : [email protected]

Category :- Poetry / Poetry

એક ને એક જ સ્થળે મળીએ અમે

રાજેન્દ્ર શુક્લ
07-12-2021

એક ને એક જ સ્થળે મળીએ અમે, હોઇએ જ્યાં ત્યાં જ ઝળહળીએ અમે
પિંડ ક્યાં પેટાવવા પડીએ અમે, હોઇએ જ્યાં ત્યાં જ ઝળહળીએ અમે

હેત દેખીને ભલે હળીએ અમે, હોઇએ જ્યાં ત્યાં જ ઝળહળીએ અમે
પાંચ ભેળાં સાવ શેં ભળીએ અમે ? હોઇએ જ્યાં ત્યાં જ ઝળહળીએ અમે

ઊભરાવું હોય જો શમવું પડે, ઊગીએ જો તો જ આથમવું પડે
મેરુ ચડતાંયે નહીં ચળીએ અમે, હોઇએ જ્યાં ત્યાં જ ઝળહળીએ અમે

કૈંક સમજ્યા ત્યારથી બેઠા છીએ, હાથમાં હુક્કો લઇ આ ઢોલિયે
ક્યાંથી મળીએ કો’કને ફળીએ અમે, હોઇએ જ્યાં ત્યાં જ ઝળહળીએ અમે

શબ્દના દીવા બળે છે ડેલીએ, આવતલ આવી મળે છે ડેલીએ
સ્વપ્ન જેવું શીદ સળવળીએ અમે, હોઇએ જ્યાં ત્યાં જ ઝળહળીએ અમે

Category :- Poetry / Poetry