OPINION

ઘણાં વર્ષો પહેલાંની વાત

અલકા મજમુદાર
23-06-2013

… ઘણાં વર્ષો પહેલાંની વાત છે. એક વૃદ્ધ સજ્જન પોતાના જુવાન દીકરા સાથે ટ્રેનમાં મુસાફરી કરી રહ્યા હતા. આ પિતા-પુત્ર તેમના વર્તનને કારણે અન્ય મુસાફરોના આકર્ષણનું કેન્દ્ર બન્યા હતા. ટ્રેન સ્ટેશનેથી રવાના થવાની તૈયારીમાં જ હતી. યુવાન દીકરો બારીની પાસે બેઠો હતો અને બહુ ખુશ દેખાતો હતો. તેનો ઉલ્લાસ અને ઉત્સુકતા ચહેરા પર સ્પષ્ટ વર્તાતાં હતાં. બીજા મુસાફરો પોતપો...તાની સીટ ઉપર આરામથી બેઠા હતા. જેવી ટ્રેન ચાલી યુવાને હાથ બહાર કાઢ્યો અને હવાને હાથમાં મહેસૂસ કરવા લાગ્યો. એ ખુશ થઈ બૂમો પાડીને કહેવા લાગ્યો, ‘પિતાજી, જુઓ કેટલી ઝડપથી બધાં ઝાડ પાછળની તરફ ભાગી રહ્યાં છે.’

પિતા પુત્રની ભાવનાઓને સમજી હસતાં હસતાં માથું હલાવી તેની વાતને સમર્થન આપી રહ્યા હતા. તેમની સામે બેઠેલું એક દંપતી પિતા-પુત્રની વાતચીત અને વર્તનને જોઈ રહ્યું હતું. તેમને આશ્ચર્ય થઈ રહ્યું હતું કે, ૨૫ વર્ષનો યુવાન કેવું બાળક જેવું વર્તન કરી રહ્યો છે. અચાનક પેલો યુવાન ફરી બૂમો પાડવા લાગ્યો, ‘પિતાજી જુઓ, તળાવ, જાનવર અને વાદળો બધાં ટ્રેનથી દૂર ભાગી રહ્યાં છે.’ અચાનક વરસાદ શરૂ થઈ ગયો અને પાણીનાં ટીપાં યુવકના હાથ ઉપર પડ્યાં. તેની ખુશીની કોઈ સીમા ન રહી. તે ફરીથી મોટેથી બોલવા લાગ્યો, ‘પિતાજી, જુઓ, વરસાદનાં ટીપાંએ મારા હાથનો સ્પર્શ કર્યો.’

હવે પેલા દંપતીથી સહન ન થયું. તેમણે વૃદ્ધને પૂછ્યું, તમારો યુવાન દીકરો સાવ નાના બાળક જેવું વર્તન કરે છે. તેને હોસ્પિટલમાં લઈ જઈને તેનો ઇલાજ કેમ નથી કરાવતા? વૃદ્ધે કહ્યું,‘ અમે હોસ્પિટલમાંથી જ આવી રહ્યા છીએ. મારો દીકરો જન્મજાત અંધ હતો. આજે તેને નવી આંખો મળી છે.’ વૃદ્ધનો જવાબ સાંભળી દંપતીનું મસ્તક શરમથી ઝૂકી ગયું.

બોધ :

કોઈના વિશે બહુ જલદી અનુમાન લગાવવું ના જોઇએ. જાણ્યાં સમજ્યાં વગર કોઈ પ્રતિક્રિયા ના આપવી જોઇએ. કોઇપણ ટીકાટિપ્પણી કરતા પહેલાં આખી વાત સમજી લેવી જોઇએ.

https://www.facebook.com/alka.majmudar.5

Category :- Opinion Online / Opinion

એક વૈષણવજન – કિશોર રાવળ

હરનિશ જાની
19-06-2013

કિશોરભાઈ મારા મિત્ર હતા. તે સાહિત્યકાર હતા. તે ચિત્રકાર હતા. તે કમ્પ્યુટર ઉસ્તાદ હતા.

કનૈયાલાલ મુન્શી સાહિત્યકાર હતા. કલાગુરુ રવિશંકર રાવળ ચિત્રકાર હતા. સ્ટીવ જોબ કમ્પ્યુટર વિઝર્ડ હતા. તેઓના મૃત્યુની મારા જીવન પર કાંઈ અસર થઈ નથી, પરંતુ કિશોરભાઈના મૃત્યુથી, મારા જીવનમાં એક ખાલીપો સર્જાયો છે. 

મારા બન્ને પુસ્તકોના કવરની ડિઝાઈન તેમણે કરી હતી. મારા કરતાં તેમનો ઉત્સાહ ઘણો હતો. તે મને એક ડિઝાઈન આપે. તે હું ચેક કરું ન કરું અને બીજા બે કવર ચિતરી નાખે. પછી એમના ઉત્સાહથી બચવા એક કવરની ડિઝાઈન ઓકે કરું, ત્યાં બીજી બે આવી હોય.પછી હું મશ્કરી કરું કે ‘યાર, પેલો કાપડિયો પણ સ્ત્રીઓને આટલી ઝડપથી સાડીઓ નહીં બતાવતો હોય.’

મારા માટે તો કલાગુરુ કિશોર રાવળ જ ગણાય ને !

મારા પુસ્તકના પ્રુફ રિડીંગની જવાબદારી પણ તેમણે લીધી હતી. મારા કમ્પયુટરમાં વરસો પહેલાં, ગુજરાતી ફોન્ટ એમણે ડાઉનલોડ કરી આપ્યા હતા. અને મારી નાની મોટી કમ્પ્યુટરની મુસીબતોના તારણહાર એ હતા. છેલ્લે મારે ત્યાં આવ્યા ત્યારે મારે બેસીને  વાતો કરવી હતી. અને એમને ખબર પડી કે મારા લેપટોપમાં માઈક્રોસોફટ વર્ડ પ્રોગ્રામ નથી. મારા લેપટોપ પર મારી ઘણી ય આજીજીજી છતાં મારી વાત ન માની અને મારી ઓફિસમાં બેસી ગયા. લેપટોપની સામે. હવે મહેમાન આપણા કામ માટે આટલો ઉત્સાહ બતાવે તો નફ્ફટ થોડું થવાય. હું પણ એમની સાથે બેઠો. મારા કમ્પ્યુટરના કોઈ પણ પ્રોબ્લેમ એમને કહેતા ગભરાતો. કારણ કે એ સાહેબ ફોન પર જ મને સમજાવવા લાગે. અને પૂછે આ કર્યું ? તે કર્યું? મનને તેમાં બહુ સમજ ન પડે તો ય હું ખોટું ખોટું હા બોલું. અને છેવટે કહું કે ‘તમારા કહ્યા પ્રમાણે બધું કર્યું છતાં કમ્પ્યુટર નથી ચાલતું.’ તે સમજી જાય કે મેં એમના કહ્યા પ્રમાણે કાંઈ કર્યું નથી. તો કહે કે ‘તમે મારે ત્યાં આવો છો કે હું તમારે ત્યાં આવું ?’

મારા સ્ટીવ જોબ એટલે કિશોર રાવળ.

મારા એક આર્ટિકલનો થોડો ભાગ મહેન્દ્રભાઈ મેઘાણીએ પોતાના પુસ્તક ‘મારી અર્ધી સદીની વાચન યાત્રા’ના ચોથા ભાગમાં લીધો છે. તેના હું મિત્રો આગળ ફાંકા મારું છું. ઘેર આવતાં મહેમાનોને બતાવું છું. મારે માટે મહેન્દ્ર મેઘાણીની પસંદ એ એક એવોર્ડ સમાન છે. હવે તે જ પુસ્તકમાં કિશોરભાઈની ‘દાદાની દાદાગીરી’ – આખી વાર્તા મહેન્દ્રભાઈએ લીધી છે.

હવે આ સાહિત્યકાર મિત્ર મારે મન મુન્શીજીથી પણ મોટા હતા. કારણકે એ મારા હતા.

તેથી પણ વધુ એ સારા માનવ હતા. એમના મોઢે મેં કદી કોઈનૂં ભૂંડું સાંભળ્યું નથી. પછી ભલેને તે વ્યક્તિએ એમનું ભૂંડું કર્યું હોય. (એક સાચા પ્રસંગનો હું સાક્ષી રહ્યો છું )

હવે આ વ્યક્તિ વૈષણવજન જ ગણાય ને !

(લખ્યા તારીખ–૨૪મી મે ૨૦૧૩)

e.mail : [email protected]

Category :- Opinion Online / Opinion