૧.
પુશ્તુનમાં નિસાસો નંખાય
એમને ગુજરાતીમાં સંભળાય છે.
દારીમાં મચેલી અરેરાટી
મારી કાઠિયાવાડીમાં ઝિલાય છે.
કાબુલની શેરીઓને અણિયાળા ખીલાઓથી કચડતા બૂટ
આ છાતીમાં ચંપાય છે.
૨.
નસોમાં વહેતું હોય
ત્યાં સુધી જ લોહી લાલ.
જમીન પર પડ્યે
મેલા કાળા ફોદાઓ
એક ઝંડો
હવામાં સળગી રહ્યો છે.
એક ઝંડો
ધીરે-ધીરે ઊંચે ચઢી રહ્યો છે.
મેલા કાળા ફોદાઓના ઓઘરાળાથી
ખરડાઈ રહી છે શેરીઓ-શેરીઓ.
ધમકીની જેમ સંભળાય છે એલાન :
તમામ આલમે-મુલ્ક
અમે તમને માફ કરી રહ્યા છીએ!
સૌજન્ય : “નિરીક્ષક”, 16 સપ્ટેમ્બર 2021; પૃ. 16