POETRY

અદ્દભુત મેળો

દીપક બારડોલીકર
23-01-2013

 

લો,
2012નો
લજ્જાયમાન
અંતિમ સૂરજ પણ ડૂબી ગયો !

અને
છવાઈ ગયું છે -
અાહા
અાતશબાજીની
સુરમ્ય રંગશેડોથી
2013નું ઊઘડતું અાકાશ !
જાણે
જામ્યો ન હોય
રંગ-ઉમંગનો અદ્દભુત મેળો !
પાર ઊતરતો ન હોય
સ્નેહ, સાફલ્યનો તિલસ્મી બેડો !

ખુદા કરે ને
સતત જામેલો રહે
અા અદ્દભુત મેળો −
અા વરસના સામા છેડા સુધી !
શાંતિ, સલામતીના ડેરા સુધી !

Category :- Poetry

અલ્લા બેલી, અલ્લા બેલી

સુંદરજી બેટાઈ
16-01-2013

અલ્લા બેલી, અલ્લા બેલી,

જાવું જરૂર છે,

બંદર છો દૂર છે !

બેલી તારો બેલી તારો,

બેલી તારો તું જ છે,

બંદર છો દૂર છે !

ફંગોળે તોફાની તીખાતા વાયરા,

મૂંઝાયે અંતરના હોયે જે કાયરા;

તારા હૈયામાં જો સાચી સબૂર છે.

છોને એ દૂર છે !

આકાશી નૌકાને વીજ દેતી કાટકા,

તારી નૌકાનેય દેતી એ ઝાટકા;

મધદરિયો મસ્તીમાં છોને ચકચૂર છે;

બંદર છો દૂર છે !

આંખોના દીવા બુઝાવે આ રાતડી,

ધડકે ને ધડકે જે છોટેરી છાતડી;

તારે છાતીમાં, જુદેરું કો શૂર છે

છોને એ દૂર છે !

અલ્લા બેલી, અલ્લા બેલી,

જાવું જરૂર છે,

બંદર છો દૂર છે !

બેલી તારો બેલી તારો,

બેલી તારો તું જ છે,

બંદર છો દૂર છે !

Category :- Poetry