POETRY

ગયો કોઈ

દીપક બારડોલીકર
25-02-2013

 

શૂળોને તૃપ્ત કરનારો ગયો કોઈ

રડે છે રણ કે દીવાનો ગયો કોઈ

 

કોઈ કાજે ખુશીથી જિંદગી હોમી

બચાવી કોઈનો માળો ગયો કોઈ

 

સબરના ઘૂંટ હંમેશાં રહ્યો ભરતો

શમાવી હૈયે તોફાનો ગયો કોઈ

 

કટે છે એમ માતમ અાજ દરિયો પણ

સહોદર જાણે દરિયાનો, ગયો કોઈ

 

હવે શું, શાલ - પોશાકો, તમે અાવ્યાં

હતો જે જિર્ણ જામાળો, ગયો કોઈ

 

ઊડે છે ધૂળ તેની શોધમાં ‘દીપક’

વિજનતા પથની હરનારો, ગયો કોઈ

Category :- Poetry

બોલ ફકીરા

દીપક બારડોલીકર
25-02-2013

બોલ ફકીરા, શું કરીએ !

કોને દિલનાં દખ કહીએ −

               બોલ ફકીરા, શું કહીએ !

 

માણસને માણસની બીક

ચોગરદમ બળબળતી ખીજ

જોરજુલમ છે ખીચોખીચ

              બોલ ફકીરા, શું કરીએ !

 

ઉપવન ઉપવન ભડકે અાગ

છે પુષ્પોની ભાગાભાગ

પંખીડાંનો માળા ત્યાગ

              બોલ ફકીરા, શું કરીએ !

 

ક્યાંના વાદળ, ક્યાંની છાંય

ધગધગ સૂરજ, શિર શેકાય

રસ્તા ‘ખાઉં − ખાઉં’ થાય

              બોલ ફકીરા, શું કરીએ !

 

કેવા હક ને ક્યાંનો ન્યાય

જ્યાંત્યા ચૌદશિયા ભટકાય

ઠાંસી દે જીવનમાં લાય

              બોલ ફકીરા, શું કરીએ !

 

ખુરશીનો જાદૂઈ ખેલ

અવળી ઘાણી, અંધા બેલ

નીકળતું લોકોનું તેલ

             બોલ ફકીરા, શું કરીએ !

 

 

Category :- Poetry