POETRY

અવતાર

‘ભભાઈ’ ભરત પાઠક
08-08-2014

અવતાર
 
મોટા અવતાર હવે લેવાનો નથ્થ, કોઈ સૂણો રે લોક સહુ સૂણો;
નાનકડા ક્રોડ ક્રોડ અવતારે ભરિયું છે દેખો ભરમાંડ ખૂણે ખૂણો.

દેવતાઓ ઝંખે છે: ઇન્દ્ર નવો આવશે, ને માણસ ઝંખે છે નવો રામ,
પોતાની શક્તિઓ સ્વારથમાં ખરચે, ને માંહ્યલો જગાવવો હરામ !
ભીતર ભલેને હોય ટાઢાં ને ટાઢાં, એ પેટાવે બ્હાર મોટો ધૂણો ! 
મોટા અવતાર ...

અવતારો લીધા ને સાચું કીધું ને વળી જીવી બતાવ્યું ઈ માણસને કોઈ દી ન ફાવ્યું,
કો’કવાર તીરથી, કો’કવાર ક્રોસે, ને કો’કવાર ઝેર, વળી કો’કવાર ગોળીએ પતાવ્યું;
પછી પૂતળાં કરીને હજુ પૂજ્યા કરે છે ! એની અક્કલને લાગ્યો છે લૂણો !
મોટા અવતાર ... 

અક્કેકા કણકણની ભીતર ભરી છ જુઓ પિંડ અને શક્તિની રમણા,
એની આ ચાલતી અનંત રૂપ-લીલા, જે અજ્ઞાનીને મન ભ્રમણા !
(પણ) એક એક કણ અને એક એક જીવ બધું હું જ છું ને કયાંય નથી ઊણો.
મોટા અવતાર ...

Category :- Poetry

શું બોલું, શું બોલું ?

‘ભભાઈ’ ભરત પાઠક
03-08-2014

શું બોલું, શું બોલું ?         

શું બોલું, શું બોલું ?
દુ:ખ હોય તો રોઉં – આ તો સુખશમણાનું ઝોલું !

પહેલવારકી ભાળી’તી જે
નેણહૂંફાળાં મરકલડાંની તરવર્ય તરવર્ય ભાત્ય,
અટવાતી, ગૂંથાતી એમાં, હસતી, રોતી, રમતી, ગાતી,
ખોવાતી, પકડાતી દીઠી તે દીથી આ જાત્ય !
કાલ સુધી જે સાવ નફકરી ફરતી’તી
ઈની ઈ હું આ ઘરમાં બેઠી ઘુમટો યે ના ખોલું !
શું બોલું, શું બોલું ?

જરાક અમથું મરકલડું
ને પલકવારમાં જીવતર મારું સાવ ગયું બદલાઈ,
રૂંવે રૂંવે ડરું,
અરે એ ક્યાંક જરા જો ઓરા આવી આછું યે તે અડી જશે તો
જાતબટકણી જઈશ હું તો સમૂળગી વેરાઈ !
સાવ સાડલો ચોફરતો ઓઢીને, આખો દેઈ બધો સંકોરી લઈને
જાતમાંહ્યલી ઝંખી રહી છે એનું એક અડપલું.

શું બોલું, શું બોલું ?
દુ:ખ હોય તો રોઉં – આ તો સુખશમણાનું ઝોલું!

[અમદાવાદ બીજી ડિસેમ્બર, ૧૯૮૩]

(c) ‘ભભાઈ’ ભરત પાઠક. Copyrights for both, the poem and the video, are with "Bharat Pathak family".

https://www.youtube.com/watch?v=Vqk5-speyK0

Category :- Poetry