POETRY

હું સિંધુતાઈ સપકાલ ...

રવીન્દ્ર પારેખ
08-01-2022

લો, આવી ગઈ સ્મશાનમાં,
ફરી એક વાર !
બહુ વાર ન લાગી આવતાં
અહીંથી જ તો શરૂ કરેલું
જીવવાનું
અહીંનાં જ પિંડને ચિતા પર શેકીને પેટ ઠાર્યું 
હવે મારો પિંડ શેકાઈ રહ્યો છે
ને જ્વાળાઓ શાંત થઈ રહી છે
કેટલી બધી ચિતા તો આંસુથી હોલવી છે
આભારી છું સ્મશાનની
જેણે અહીંથી ઉઠાડી
ને અહીં સુવાડી છે 
હવે હોલવાઈ ગઈ છું ત્યારે પેટાવવા બેઠા છે
પણ હવે ઊઠવાનું નથી
ઊઠી ગઈ છું
આમ તો જન્મી ત્યારે ચીંથરું જ તો હતી !
ને દેહ સમજાય તે પહેલાં તો
નવા દેહને જન્મ આપ્યો
પતિએ છોડી દીધી પેટ સાથે
તો બાળકી જન્માવી કોઢે
ગાય મારી દાયણ બની 
ને એની દેખરેખમાં જન્મ્યું મખમલ
જોકે, આ ચીંથરાએ જીવવાનું તો હતું જ !
તે જીવ્યું પ્લેટફોર્મ પર-
દોડતી ગાડીએ ભીખ આપી
તો કોઈકે કટકા નાખ્યા 
એનાં બટકાં કર્યાં
ને વહેંચ્યાં ચીંથરાં વચ્ચે
એ બધાં ચીંથરાં જોડીને મેં 
ઓઢ્યું અખંડ માતૃત્વ ! 
જેનું કોઈ ન હતું 
એની હું થઈ
મને નાથ તો હતો
પણ અનાથની ગોદડી હું થઈ
એ ગોદડીમાં મારા પતિનેય મેં સીવ્યો
એ મારું સૌથી મોટું સંતાન છે
મારાથી બમણું મોટું !
એમાં મારી દીકરી અળગી કરી
એને રડતી છોડી 
જેથી 
બીજી આંખો લૂંછી શકું
આજે કેટલી બધી વહુઓ 
અને 
જમાઈઓની લીલી વાડી મૂકીને જાઉં છું 
એ બધાં મારાં નથી
પણ હું એમની છું
ને હવે કોઈની નથી
મારી પણ નહીં
કૈં ન હતું ત્યારે જીવી 
ને હવે બધું છે તો જાઉં છું ...
આવજો !

000

e.mail : [email protected]

Category :- Poetry / Poetry

Morbidity -

યોગેશ ભટ્ટ
07-01-2022

ઝલમલ ઝૂલતા આકાશને પડદે બહાર નીકળી સવારે
ઢોળાતો સૂર્ય
નીચે -
'મ્યાંઉં'માંથી બનેલી બીલાડી ઉપર .....
બીલાડીના પગ નીચે બંધાયેલ
હરતો, ફરતો, થંભતો પડછાયો તેનો ...
બીલાડીના હરતા ફરતા પડછાયા
નીચે
ઊભેલા એક ઘર માથે ઢેઢગરોળી શી
ચોંટી રહેલી છત -
ઘર ઉપરની છતની નીચે
દબાયેલી ચંપાયેલી રહેતી ઘરની ભોં ઉપર


ઊલટી
ઝળૂંબી રહેલી છત -
- ઢેઢગરોળીના પેટ જેવી -
(સૂર્યના 'ન'-કાર જેવી!)
ઘરમાં હરતાં ફરતાં શ્વાસોચ્છવાસોના વાદળો .....
કોઇ સૂક્કાં, કોઇ ભેજિયાળાં
બારીઓની કેદમાં બંધાયેલ સળિયા
બારણાઓ વચ્ચેના અવકાશ નીચે ચંપાયેલો રહેતો ઉંબર :
એ ઉંબરે -
સમી સાંજે સંકેલાતો સૂર્યના પ્રકાશનો પડછાયો
- સંકેલાય
વળી બીલાડીના’મ્યાંઉં’માં :
ઉંબરની અંદરના સંબંધો બહાર
ઉંબરની બહારના સંબંધો અંદર ....
આ -
લખાયેલા અક્ષરોની નીચે કાગળ કોરો :
આંખની નીચે અક્ષરો,
કાગળની ઉપર વંચાતા
ને
એ લખનાર :
અક્ષરોમાં થઇ,
            કાગળની બહાર! .....

Category :- Poetry / Poetry