રાજકોટની વર્તમાન પરિસ્થિતિ – રાજકોટી કવિના શબ્દો ..
***
વાયરો આડો ફાટે તો ઠીક મારી બઈ
આ તો ચોમાસું આડું ફાટ્યું રે સઈ
હું તો લથબથ, લથબથ ભીંજાતી ગઈ
આ તો ચોમાસું આડું ફાટ્યું રે સઈ
ભફાંગ દઈને વાદળ, હેઠું જ્યાં પડ્યું
ને આંગણિયું રેલમછેલ
કેટલીયે ગગડાટું કૂવામાં ખાબકી
ને ફાટી ગઈ માટીની હેલ
કમખાની દોરીએ ઝીણી વીજળિયું ઝબુકતી થઈ
આ તો ચોમાસું આડું ફાટ્યું રે સઈ
શેરીએથી ફળિયે ને ફળિયેથી ઉંબરે
ધોધમાર ઊતર્યું આકાશ
ઘનઘોર ઘેરાતાં આયખાની માલીપા
આછો આ શેનો ઉજાશ ?
આ ઝીણકુડાં ટીપાથી મારી તરસ્યું છીપાશે કે નઈ ?
આ તો ચોમાસું આડું ફાટ્યું રે સઈ