POETRY

ગધના − ગધનીનાં ગીત …

દીપક ત્રિવેદી
27-02-2013

ગધનાની આંખોમાં છલકે સરવરિયા બે-ચાર, 

ગધની એમાં ડૂબી જાય ...
ગધનો ખીલે સોળ કળાએ નદિયુંની મોઝાર,
ગધની એમાં ડૂબી જાય ...

કમળ એટલે ગધનો
ગધની કમળપાંદડી જેવી !
વમળ એટલે ગધનો
ગધની ગતિશાસ્ત્રની દેવી !!

ગધનો ઝીલે ઝરમર ઝરમર વરસે અનરાધાર,
ગધની એમાં ડૂબી જાય ...

કોઈ બગીચો ગધનો
ગધની એના ફરતી વંડી !
મઘમઘ જંગલ ગધનો
ગધની એની તો પગદંડી !!

ગધનો ફુગ્ગો ફૂલણશીનો ફૂટે પારાવાર,
ગધની એમાં ડૂબી જાય ...

શબદ એટલે ગધનો
ગધની થાતી કાનો માતર !
પવન એટલે ગધનો
ગધની એના ફરતી ચાદર !!

ગધનો અરધો પાણી જેવો અરધો છે પગથાર,
  ગધની એમાં ડૂબી જાય ...
ગધનાની આંખોમાં છલકે સરવરિયા બે-ચાર, 
ગધની એમાં ડૂબી જાય ...


°

 

ગધના પાસે ગધની બેઠી                 

 

ગધના પાસે ગધની બેઠી સોળ કળાએ ખીલવા !

ગધનો પણ બેઠો છે એવો શ્રાવણ – ભાદર ઝીલવા !

 

ગધનો પૂછે ગધનીને આ સાત સમંદર પાર …

હોડી નૈ, હલ્લેસું નૈ, બસ તું અમને ઉતાર …

 

ગધનો ખોલે પ્રેમગઠરિયાં ગધની માંડે હીલવા !

ગધના પાસે બેઠી સોળ કળાએ ખીલવા !

 

ગધનો ઝીંકે આડાઅવળી પ્રેમ-બ્રેમની વાત !

ગધની જાણે બનતી જાતી મેઘધનૂષી જાત !

 

કોઈ દિવસ આજે ગધની માંડી સપના છીલવા …

ગધના પાસે ગધની બેઠી સોળ કળાએ ખીલવા …

 

http://deepakgtrivedi.wordpress.com/2013/01/24/ગધના-ગધનીનાં-ગીતો/

 

Category :- Poetry

ગયો કોઈ

દીપક બારડોલીકર
25-02-2013

 

શૂળોને તૃપ્ત કરનારો ગયો કોઈ

રડે છે રણ કે દીવાનો ગયો કોઈ

 

કોઈ કાજે ખુશીથી જિંદગી હોમી

બચાવી કોઈનો માળો ગયો કોઈ

 

સબરના ઘૂંટ હંમેશાં રહ્યો ભરતો

શમાવી હૈયે તોફાનો ગયો કોઈ

 

કટે છે એમ માતમ અાજ દરિયો પણ

સહોદર જાણે દરિયાનો, ગયો કોઈ

 

હવે શું, શાલ - પોશાકો, તમે અાવ્યાં

હતો જે જિર્ણ જામાળો, ગયો કોઈ

 

ઊડે છે ધૂળ તેની શોધમાં ‘દીપક’

વિજનતા પથની હરનારો, ગયો કોઈ

Category :- Poetry