POETRY

આષાઢી બપ્પોર

'ભભાઈ' ભરત પાઠક
08-08-2014

આષાઢી બપ્પોર

સ્યુગર લેન્ડ ગામના તળાવ મહીં ઝિલાતી,
આષાઢી નોમની બળતી બપ્પોર મને એવી તો વ્હાલી, સઇ, લાગી,
કે રૂ જેવાં વાદળાં આકાશી નીલમાં સરતાં ભાળીને
મારી સાંભરણ ગામ ભણી ભાગી.

“સૂમસામ બપ્પોરે દોડતી’તી સાઇકલ, ડામરમાં તરતા તડકાઓ,
ગરમાળો, ગુલમહોર ખીલવે ને ખેરવે કંઈક નવી જૂની કથાઓ”
આજ સૂરજ ભણીના ગાલ પરની બળબળ
મને ગામથી આવી હો એવી લાગી !
અલી, રૂ જેવા વાદળાં આકાશી નીલમાં ફરતા ભાળીને
મારે તંન જૂની આશાઢો જાગી.

“આજે જે તાપ છે તે કાલ ઘામ કહેવાશે, વાદળાં વધુ ને વધુ ઘેરાશે,
પરસેવો તડકામાં સૂકાશે નહીં, એ તો વરસે પછી જ તો ધોવાશે...”
એવી એવી કંઈક વાતોના ભણકારા અહીંની હવામાં ય વાગે,
અને રૂ જેવા વાદળાં આકાશી નીલમાં તરતા ભાળીને સઇ
મંન મારું વીતેલું તાગે.

વીત્યા ઉનાળા ને વીત્યા એ તાપની ઝરમર વણથોભ એમ ચાલતી,
જેમ ભીંજાતી આંખોની સામે તળાવમાં બત્તક ને કાચબીઓ મ્હાલતી;
આજ, રૂ જેવા વાદળાં ચાળતી બ્પ્પોરમાં એવું તો વ્હાલ, સઇ, વાધ્યું
કે આકાશી નીલને ઝીલતાં તળાવોનું
સ્યુગર લેન્ડ નામનું એક નવું ધામ મને લાધ્યું.

સ્યુગર લેન્ડ, ટેક્સાસ, યુ.એસ.એ., જુલાઈ ૨૦૦૯ 

[૨૦૧૩માં પ્રકાશિત તેમના પદ્યસંગ્રહ “ચાલ, ચાલ, ચાલ...”માંથી ]

e.mail : bhabhai@hotmail.com

Category :- Poetry

અવતાર

‘ભભાઈ’ ભરત પાઠક
08-08-2014

અવતાર
 
મોટા અવતાર હવે લેવાનો નથ્થ, કોઈ સૂણો રે લોક સહુ સૂણો;
નાનકડા ક્રોડ ક્રોડ અવતારે ભરિયું છે દેખો ભરમાંડ ખૂણે ખૂણો.

દેવતાઓ ઝંખે છે: ઇન્દ્ર નવો આવશે, ને માણસ ઝંખે છે નવો રામ,
પોતાની શક્તિઓ સ્વારથમાં ખરચે, ને માંહ્યલો જગાવવો હરામ !
ભીતર ભલેને હોય ટાઢાં ને ટાઢાં, એ પેટાવે બ્હાર મોટો ધૂણો ! 
મોટા અવતાર ...

અવતારો લીધા ને સાચું કીધું ને વળી જીવી બતાવ્યું ઈ માણસને કોઈ દી ન ફાવ્યું,
કો’કવાર તીરથી, કો’કવાર ક્રોસે, ને કો’કવાર ઝેર, વળી કો’કવાર ગોળીએ પતાવ્યું;
પછી પૂતળાં કરીને હજુ પૂજ્યા કરે છે ! એની અક્કલને લાગ્યો છે લૂણો !
મોટા અવતાર ... 

અક્કેકા કણકણની ભીતર ભરી છ જુઓ પિંડ અને શક્તિની રમણા,
એની આ ચાલતી અનંત રૂપ-લીલા, જે અજ્ઞાનીને મન ભ્રમણા !
(પણ) એક એક કણ અને એક એક જીવ બધું હું જ છું ને કયાંય નથી ઊણો.
મોટા અવતાર ...

Category :- Poetry